PARIBASA BALI

BASITHA PARIBASA BALI

Basitha Paribasa inggih punika basa rerasmen wiadin panglengut basa. Kanggen panglengut basa sajeroning mabebaosan kalih magegonjakan, sajeroning basa pakraman wiadin basa pasawitrayan. Seosan ring punika, Sang Kawi sane sampun wibuhing Basa Basitha, tan mari ngunggahang Basitha Paribasa puniki, sakadi Uperenga miwah Pralambang, sane makardi lengut kakawian punika. Sane ngranjing Basitha Paribasa minakadi ; Sipta,  Peparikan,Sasemon, Sesimbing, Raos Ngempelin, Cecangkitan, Pepindan, Sesonggan, Cecangkriman, Cecimpedan, Wewangsalan, Sloka, Sesawangan, Sesenggakan, lan Bebladbadan.

Puniki wenten makudang-kudang imba paribasa Bali punika minakadinnya :

Sipta (Pertanda)

Sipta puniki wangsit wiadin ciri-ciri sekala miwah niskala, becik wiadin kaon, sane wenten arti kalih suksmanipun. Sipta puniki kawedarang antuk barang sane wenten ring jagate, buron miwah pripen kalih polah. Ring asapunapine taler wenten saking bawan jagat alih ring pakahyunan, upami :

         1. Yening wenten bintang kukus kanten ring langite kangin, punika kocap sipta (pertanda) kaon.

         2. Yening wenten buron alasan makadi kidang, manjangan ngranjing ka desa, punika kicap sipta kaon.

         3. Yening paksi culik-culik masuara kala wengi, nenten kasaurin olih i tuhu-tuhu, punika kocap sipta (praciri) kaon.

Peparikan (Pantun)

           Peparikan pateh sakadi Wewangsalan, kewanten binanipun wewangsalan punika wantah kalih palet (carik), yening peparikan kawangun antuk petang palet dados apada (satu bait), taler mawirama miwah mapurwakanti. Peparikan puniki taler sakadi sasimbing indik kahanan kalih polah janma, kawangun antuk lengkara petang carik dados apada (satu bait). Lengkarane sane riinan kalih carik dados "sampiran", lengkarane pungkuran sane kalih carik dados arti sejatine, saha mawirama purwakanti, (a-b, a-b). Purwakanti punika wenten tatiga, luiripun: Purwakanti sastra, Purwakanti basa, Purwakanti suara, sakadi:

        a   Purwakanti sastra

            Doyan liang ngandong kanji (a)

            depang tiang ngaba pitu (b)

            yan tiang ngelong janji (a)

            apang tiang kena tantu. (b)

        b   Purwakanti basa

            Meli gabus duang kranjang

            lamben bodag sing ngenyakin

            yadin bagus mata kranjang

            enyen kodag mangenyakin.

        c   Purwakanti suara

            Dengdenge kurma lua

            jaene ditu plapahin

            adeng-adeng magama tua

            gaene malu plajahin.

inggih wantah asapunika dumun prasida aturang tityang, benjang pungkuran yening polih galah malih aturang tityang imba-imba paribasa Bali sane lianan, mogi wenten pikenohipun. sane sampun ngranjing mriki durus komen utawi like ring sajeroning post sane sampun katurang. suksma....^_^...