PUISI BALI ANYAR

Jendéla kayun

Iriki ring sor jendélané,

Tiang melengok ngaksinin sang surya sané megingsir ka bucun galah,

umbarane barak nyanggra sandikala sane rauh magpagin wengi,

nutdutin manah sane katepesin rasa kangen,

kangen tekén munyin rerama, kangen tekén embahan pitresnan rerama,

ejoh dini tiang manongos, ngisinin raga antuk widya,

mangda maguna, dados sundih ring kulawarga,

yadiastu sunarnyane remrem nanging setata  ngangetin,

Ngukir kenyem bangga ring cangkem rerama,

Suryane engseb ninggalin lawat I punyan waru,

Sang Hyang Bayu budal tan ngesirin kampid I paksi malih,

jendélané kasineb, I paksi maparama santi,

Om Çantih, Çantih, Çantih, Om

Olih : Sang Made Tresna Wicaksana