Sang parama sadaka sane arumang
tityang, para panglingsir, para prajuru adat miwah dines sane kesumayang
tityang, para
atiti tios sane taler wangiang tityang. Maka purwakaning pangastuti tityang
ngaturang suksmaning pangastungkara
Om Swastyastu
Tan parameya, tan keni winilang garjita
manah tityang dawning tityang kasarengin para atiti sami sida matemu wadana,
masadu ajeng ring galahe sane dahat becik rahinane puniki, nenten tios jagi
iring tityang sareng-sareng nunas ica ring Ida Sang Sangkan Paraning Dumadi,
ring Ida Sang Hyang Widhi Wasa, mogi irage sareng sami pamekas sang dampati,
sang sane kawidhi wadanen miwah sakulawarganyane ngamangguhang kerta rahajeng,
dirgahayu dirghayusa, tan keneng upadrawa, ngamangguhang mokshartam jagadhita
ya ca iti dharma.
Ratu Ida Dane para atiti sami
Sang pradnyan maosang, mauripe ring
jagate kocap wantah akijapan tatit. Yen baosang suwe, yukti suwe, yen baosang
ajebos, yukti wantah ajebos pisan. Yadiastu asapunika, ngiring kauripane sane
ajebos puniki dagingin antuk subha karma, antuk pikahyun, baos miwah
parilaksana sane becik, amerih sukaning parajana, tan ngetung laraning awak,
dumadak kapungkur wekas prasida ngamangguhang suba pala.
Yukti, yen jagi ngardi sane becik,
waluya amawa wungkal mareng agraning parwata, kadi ninting batu ka pucak
gununge. Yen jagi ngardi sane kaon waluya anglepasaken wungkal sakeng agraning
parwata, kadi ngelebang batu saking pucak gununge. Gumanti abot, meweh jagi
ngardi sane becik. Yadiastu asapunika, sampunang surud ngardi rahayu, sampunang
surud mapakardi sane becik, duaning makasami punika wantah ajah-ajah Sang Hyang
Agama sane prasida jagi ngatehang nyujur suniatane, masikian ring Sang Hyang
Ekatma.
Ratu Ida Dane para atiti sane
kasutriang tityang, pamekas ring dampati purusa pradana miwah ring
kulawargannyane. Pawiwahane puniki boya ja panguntat pamargi kahuripane. Yening
masa pawiwahane puniki sampun kalintangin, ring ajeng nyelantah margi kauripane
sane dahat panjang, tan pantara yajanannyane. Margine punika boya ja margi sane
nulus, kemawon margi sane kebekan antuk duwi, batu tanying miwah pangandang
tiyosan. Yen prade iraga tan urati nindakang batis, pastika jagi katanjung.
Punika awinan, plapanin matindakan, uratiang, pedasang margine sawireh anake
katanjung ten ja ring bukite, ten ja ring batune ageng, kemawon ring batune
cerik. Yen sampun katanjung, tan dugi-dugi antuk sakitne.
Ratu Ida Dane sareng sami
Tityang nunas galah ajebos, dawning
tityang jagi mapiteket amatra ring sang dampati, dumadak wenten pikenohnyane.
Makurenane punika satmaka sampun
nyikiang kalih gambar ring jinah logame asiki. Yen wantah asiki madaging
gambar, jinah logame tan paaji. Punika mawinan sang kalih mangda satata
salunglung sabayantaka, kadi I jukung sareng I dayung. Yukti dayunge, I jukung
ajaka makotek, kewanten sampunang bas pepes makotek, yen satata makotek, I
jukung tan jagi nahenin rauh ring tatujonnyane. Yen I jukung nglaksanayang
swadharmaning jukung, I dayung satata nglaksanayang swadharmaning dayung, sinah
I jukung prasida mlayar ngentas segarane linggah, mawastu sida labda karya,
ngamangguhang sidaning don.
Taler wenten wimba tiyos, kadi I timba
lan I semer. Yen I timba satata nyegik baduur, ipun tan jagi molihang toya. Yen
prade I timba nyak nyerod nuunang, ngandapang dewek, janten prasida molihang
toya sane wenten ring semere. I semer sampunang cupar, riantuk yen sampun
toyane sida kasalud, wigunanne pastika mawuwuh, dados anggen mabersih, dados
anggen nyakan, pamekas dados anggen tirta mautama nglukat sarwa mala.
Ring dampati purusa tityang mapakeling,
nyuang anak istri satmaka ngidih pijer sane kabibitin olih reramannyane.
Risampune rauh ring paumahan sang lanang, melahang mamula pijere punika,
siamin, pagehin, apang kapungkur wekas mentik dadi nyuh ane werdi. Yen suba
mentik dadi nyuh, slepan, busung, bungkak, duwegan katekeng nyuhnyane dadi
wigunayang. Yen prade buin pidan nyuhe tua, sing sida buin mabuah, punyannyane
ane wayah ento dadi anggon seseh anggon ngwangun gedong, tongos parisentanane
masayuban.
Inggih Ratu Ida Dane para darsika sane
wangiang tityang. Wantah asapunika atur tityang, dumadak sarine sida
kamolihang, ampasne sida kakutang.
Ampura pang banget tunas tityang,
dwaning sampun janten katah kirang langkung antuk tityang matur iriki ring
ajeng, dumadak sweca ngampurayang.
Om Shantih, Shantih, Shantih Om
